brandari

Finnst dálítið sorglegt að sjá brosin á þessum krökkum sem eru að reyna að styggja ekki "böðlana". Ég trúi því ekki að margir hafi gaman að láta hella ógeði yfir sig og niðurlægja sig. Mér finnst alveg gríðarlega athyglisvert að það skuli vera látið viðgangast að einhverjir krakkagemlingar fái útrás fyrir hvatir sínar á þennan hátt á skólalóðum. Það er eitt að fólk sem áhuga hefur á drottnun, undirgefni og niðurlægingu hittist af fúsum og frjálsum vilja í heimahúsum til að stunda svona afbriðgilegheit. En að þetta sé látið fara fram á lóðum skóla í opinberri eigu. Þvílíkur brandari. Það er alveg með óíkindum hvað fólk getur umborið í krafti hefða og vana.

Varað við busavígslum

Athugasemdir

[Sigríður G. Malmquist, 2.9.2008 kl. 17:03]

Þvílíka ruglið!! Væri ekki gáfulegra að gera eitthvað uppbyggilegt með þessum nýnemum...já ef ég fengi að ráða....

[Sonja (IP-tala skráð) 3.9.2008 kl. 15:52]

ég er sjálf nemi í menntaskóla og busadagurinn minn er ein besta minning og skemmtilegasta minning sem ég á. Sjálf er ég í MR og ég öfunda ennþá busana sem koma inn í skólann því ég man svo vel eftir hvernig busadagurinn minn var. Þótt busunin sé ekki mikil í MR þá á ég vini í öðrum skólum og allir tala um busadaginn sinn sem einn af bestu dögum skólagöngunnar. Vildi bara láta ykkur vita að þótt þetta líti illa út þá er þetta alls ekki jafn ,,hræðilegt´´og þið haldið.

[Oddgeir Einarsson, 3.9.2008 kl. 20:22]

Það er um áratugur síðan ég var í menntaskóla þannig að ég man ennþá eftir þessu sulli eins og það var í MS. Mysa, skyr og allskonar úldin drulla sem nemar voru baðaðir í áður en þeir tóku strætó heim. Get ekki sagt að ég beri stór ör á sálinni eftir þessa meðferð en ég öfunda ekki þá einstaklinga af skólagöngu sinni ef þetta var þeirra besti dagur í skólanum.

[Sonja (IP-tala skráð) 5.9.2008 kl. 15:53]

Bara láta þig vita þá var ég sjálf Ofurbusi, og var tekin einmitt sérstaklega fyrir og ekki tók ég því sem einhverju einelti eða hlaut skaða af, kanski eru einhverjir viðkvæmari fyrir þessu, ég skal ekki segja um það. Ég veit ekki um neitt dæmi um það að einelti hafi byrjað útaf þessu, allavega ekkert í mínum skóla og ég skil ekki alveg hvernig það ætti að gerast miðað við meðferðina sem ég fékk sem OFURbusi. Busunin í MR er kannski vægari en í öðrum skólum en hún er alveg rosalega skemmtileg og flott hefð...þið ættuð kanski að kíkja á hana einhverntíma.  Þótt sumir skólar séu með ógeðslegar busanir þá er ekki hægt að alhæfa svona og segja að busun sé bara hræðilegur hlutur. Hjá okkur í MR eru mjög strangar reglur um hvernig busunin má fara fram, það eru kennarar á vappi allan tímann til að sjá til þess að enginn fari yfir strikið og að lokum fá allir súkkulaðiköku og mjólk...skælbrosandi og ánægðir.

[Sara (IP-tala skráð) 11.9.2008 kl. 23:29]

Ég var busuð í Menntaskólanum á Egilsstöðum og hann er flokkaður með þeim skólum sem hafa verið verstir í busavígslum gegnum árin. Ég viðurkenni að mér fannst ekki gaman að borða hafragraut með karrí, en annað sem við gerðum - plön um að sleppa frá böðlunum, fíflagangur og síðast en ekki síst drullubrautin - það var allt bara skemmtun og enginn sem ég veit um sem leið eitthvað illa. Enda er hægt að biðja sérstaklega um að fá að sleppa hluta eða allri busuninni, og ég trúi ekki öðru en að það sé hægt í öðrum skólum líka.

Það að busunin haldi áfram allan veturinn hef ég aldrei heyrt. Það er bara almenn regla að um leið og busarnir hafa gengið gegnum vígsluna eru þeir nýnemar, ekki busar. Ef einhver böðull hefur haldið áfram að "busa" allan veturinn kemur mér ekkert á óvart þótt hann hefði gert það án þess að busunin hefði átt sér stað, það eru til úldin epli útum allt.

Ég veit ekki hvernig þetta hefur verið þegar þú varst busaður, en í dag er allavega haldið mjög vel utan um reglurnar og alltaf passað upp á að fara ekki yfir strikið.

Það lá við að ég væri pínu vonsvikin þegar ég byrjaði í Háskóla Íslands og það eina sem eldri nemendur gáfu okkur var pulsur og bjór. En maður er kannski vaxinn uppúr menntaskólaárunum.

[Oddgeir Einarsson, 12.9.2008 kl. 01:09]

Sonja: "Þótt sumir skólar séu með ógeðslegar busanir þá er ekki hægt að alhæfa svona og segja að busun sé bara hræðilegur hlutur."

Vinsamlegast bendið mér á þá setningu þar sem alhæft er að busun sé hræðilegur hlutur.